Германските производители на чоколадо го зголемија своето производство за 1,7 отсто до 1,2 милиони тони, и покрај ланската висока инфлација и послабата економија, објави Германското здружение за прехранбена индустрија (BDSI) од Бон. Потрошувачката по глава на жител во Германија е благо зголемена на околу 9,56 килограми.

Пред Велигден се очекува секој граѓанин да изеде повеќе од едно чоколадно зајаче, а индустријата произведува 108 милиони чоколадни зајачиња за продажба во Германија. Инфлацијата не ја заобиколи ниту прехранбената индустрија, што е забележливо по тоа што вредноста на чоколадните производи произведени во Германија се зголемува побрзо од производството, за 4,5% на околу 6,2 милијарди евра (6,7 милијарди долари). Особено силно се зголеми извозот.

Дебатите околу здравата исхрана не влијаат на апетитот на земјата за чоколадо: во раните 1980-ти, проценката за консумирање по лице беше значително помала и изнесуваше 6,5 килограми. Според портпаролката на Здружението, овие бројки треба да се толкуваат внимателно, бидејќи дефинициите за чоколадните производи се сменија во текот на изминатите децении.

Според Здружението, млечното чоколадо останува омилен вкус, и покрај тоа што многу производители додаваат темно чоколадо со големи количини какао во нивната палета. На пазарот сѐ повеќе се нудат вегански варијанти и производи кои користат какао од одредени земји на потекло како Еквадор или Перу.