По повеќе од десет години, фолк-легендата Виолета Томовска ѝ се врати на музиката. Томовска сними преработка на нејзината песна „Заиграј со мене“, која оригинално ја сними во 1990 година со хармоникашот Милан Завков, кој е автор на музиката. Завков ненадејно почина на 7 февруари минатата година на 61 година.

Новата верзија Томовска ја пее со дуото Дац и Александар, продуцентот Александар Митевски и актерот Драган Спасов-Дац. Митевски е автор на новиот аранжман на песната. Митевски и Спасов велат дека песната е направена во чест и сеќавање на големиот автор и човек Милан Завков и претстојниот 80. роденден на кралицата на македонската песна Виолета Томовска.

„Направивме нова верзија на оваа вечна песна. Повозрасните да се потсетат, а помладите да научат и дознаат“, велат Дац и Александар.

„Не можам точно да се сетам кога последно снимив песна и иако сум добила неколку понуди и сум ги одбила, оваа не можев. Кога влегов во студио, бев загрижена во кој тоналитет Александар ја направил новата верзија. Ми рече да не се грижам и беше во право. Ја снимивме песната од прва, без враќање“, ни рече Томовска.

Ова снимање ја потсетило на она пред 24 години, кога ја снимила песната со Милан Завков и групата „Македонски мерак“.

„Додека пеев, се сеќавав на Миланче, ми се вратија слики од 1990 година кога снимав со него. Беше еден прекрасен човек, многу весел, многу талентиран, многу има направено за нашата музика и за нашиот фолклор. Неправедно е колку млад си отиде, имаше уште живот пред него. Редовно се слушам и дружам со неговото семејство“, вели Виолета Томовска.

Со Завков има снимено многу песни, но вели дека на идеја на дуото ја препеала оваа.

„Многу ја почитувам работата на Александар и Дац и драго ми е што снимаат нова музика, но и што не ја забораваат старата и што токму мене ме поканија да соработувам со нив“, вели Томовска.

Во текот на 65-годишната кариера таа напишала многу текстови. Со радост се сеќава на денот кога ја добила музиката за „Заиграј со мене“ од Милан Завков и знаела дека текстот треба да биде весел и го посветила на младите.

Томовска, која во март следната година ќе наполни 80 години, во 2019 најави дека 60-годишниот јубилеј ќе го прослави со концерт. И претходно за јубилеите најавуваше концерти, но вели дека немало доволно интерес од државата да вложи во нив.

„Идеја за концерт имав уште во времето кога сопругот ми беше жив. Се сменија времињата и немаше многу интерес од институциите да помогнат, па се откажав од таа идеја“, вели Томовска.

Спотот за новата верзија на „Заиграј со мене“ почнува со снимка каде што се појавува и Милан Завков

Првата песна која ја снимила во 1959 година била поп-музика, од Димитар Масевски.

„Победив на изборот за млади таленти во Радио Скопје со песната од Димитар Масевски ‘Симни ми ги и најмалите ѕвезди’. Потоа патот ме однесе кон народната музика“, вели Томовска.

Досега снимила над 1.000 песни, одржала голем број концерти дома и во многу други земји и снимила плочи со тиражи од 100.000 примероци за ПГП РТБ. На 38 години, во екот на популарноста, Томовска се разболела од рак на двете дојки. Долги години го водеше здружението „Животна искра“ и така им помагаше на жени, мажи и деца заболени од рак.

„Мило ми е што додека постоеше здружението им помогнавме на многу пациенти. И сега, откако веќе не е активно и се појавија многу здруженија, горда сум на нашата работа“, вели Виолета Томовска.

Особено ѝ е драго што спотот за новата верзија на „Заиграј со мене“ почнува со старата верзија на песната и со снимката каде што се појавува и Милан Завков.

М. ЏАРОВСКА