Ема Хеминг Вилис за првпат јавно прозборе за состојбата на нејзиниот сопруг Брус Вилис, велејќи дека „мозокот го напушта“ и полека го губи говорот. На 70-годишниот Вилис му беше дијагностицирана фронтотемпорална деменција пред повеќе од три години.

„Брус и натаму е многу подвижен. Севкупно, неговото здравје е добро, но мозокот го изневерува“, кажа Хеминг Вилис, гостувајќи во емисијата „Добро утро Америка“ на „Еј-Би-Си њуз“.

Таа напиша книга за искуствата на нејзиното семејство со деменција, која наскоро ќе излезе.

„Брус го губи говорот и учиме да се прилагодиме. Имаме начин на комуникација со него, што е еден поинаков начин“, рече таа.

Фронтотемпорална деменција се опишува како невообичаен вид деменција што предизвикува проблеми со однесувањето и говорот.

Хеминг Вилис кажа дека на почетокот мислела дека мора сама да му помага на својот сопруг, што довело до бессони ноќи и повлекување од социјалниот живот. Таа се надева дека нејзината нова книга, насловена „Неочекувано патување: Наоѓање сила, надеж и себеси на патот на грижата“, може да послужи како патоказ и водич за други кои се грижат за лица погодени од деменција.

„Семејството сè уште гледа блесоци од неговата вистинска личност. Не денови, но добиваме моменти. Понекогаш ќе го видам сјајот во неговите очи или таа насмевка и едноставно се транспортирам. Тешко е бидејќи колку брзо се појавуваат тие моменти, толку брзо и исчезнуваат. Но, јас сум благодарна што мојот сопруг е сè уште тука“, кажа Хеминг Вилис.