АКО НЕМА ЦЕНЗУС НА ПРЕТСЕДАТЕЛСКИТЕ ИЗБОРИ, МОЖНО Е ПРЕТСЕДАТЕЛ ДА СЕ БИРА ВО СОБРАНИЕТО, ВЕЛИ МИНИСТЕРКАТА ДЕСКОСКА

    АКО НЕМА ЦЕНЗУС НА ПРЕТСЕДАТЕЛСКИТЕ ИЗБОРИ, МОЖНО Е ПРЕТСЕДАТЕЛ ДА СЕ БИРА ВО СОБРАНИЕТО, ВЕЛИ МИНИСТЕРКАТА ДЕСКОСКАЗа да биде избран претседател во вториот круг, потребна е излезност од 40 отсто. - Министерката за правда Рената Дескоска (Фото: Влада на РСМ)

    Министерката за правда Рената Дескоска кажа дека ако не биде постигнат потребниот цензус на претстојните претседателски избори постојат две можности, од кои едната е претседателот да се избира во Собранието. Другата е шефот на државата да се избира непосредно од граѓаните без потребно мнозинство во вториот круг, т.е. да се укине цензусот, што е и препорака на Венециската комисија.

    Претседателските избори треба да се одржат на 21 април и на 5 мај.

    „Ние имаме препорака од Венецијанска комисија дека цензусот што постои во Уставот за избор на претседател е нешто што не е соодветно и мора да биде тргнато. Тоа е препорака што се провлекува уште од претходните избори. Странските експерти веќе забележале дека има нешто што е нетипично во другите земји што некогаш на некој начин може да претставува опасност за да не може успешно да се спроведат претседателски избори. Менувањето на Уставот со цел да се олесни процесот на избор на претседател е нешто што веќе е препорачано и од ОБСЕ односно ОДИХР. Има две опции, едната е претседателот да се избира на непосредни избори без потребно мнозинство на излезност во вториот круг. Тоа значи кој ќе добие повеќе гласови победува и тука немате можност да минирате избори преку бојкот. Другата опција е избор на претседател во Собрание. Тоа се две различни опции кои се можни и кои постојат во компаративното право, изјави Дескоска по денешната Европска конференција за медијација, одговарајќи на новинарско прашање прашана дали се размислува за менување на Уставот во делот на изборот на претседател ако не биде постигната потребната излезност на изборите.

    Претседателските избори треба да се одржат на 21 април и 5 мај.

    Според сегашното решение во Уставот, за да биде избран претседател во првиот круг, потребно е за него да гласаат мнозинство од вкупно запишаните 1.808.131 избирачи, односно најмалку 904.066 граѓани со право на глас. Ако во првиот круг никој не го добие потребното мнозинство, во вториот круг одат двајцата кандидати што освоиле најмногу гласови во првиот круг. За претседател ќе биде избран кандидатот кој добил мнозинство од гласовите, доколку на гласачките места излегле повеќе од 40 отсто од запишаните избирачи, односно 723.253 гласачи.

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира

    Коментари