Деградацијата на животната средина во земјата сериозно ги загрозува човековите права на живот, здравје, домување и вода, соопшти Советот на Европа по посетата на Комесарот за човекови права Мајкл О’Флаерти на Македонијa.

Интеракцијата на здрава животна средина и заштита на човекови права беше во фокусот на неколкудневната посета на О‘Флаерти. Тој признава дека Северна Македонија учествува во сите главни меѓународни инструменти за животна средина, дека работи на усогласување со европските стандарди во оваа област и е лидер во признавањето на правото на здрава животна средина во Уставот и на екоцидот во нејзиниот кривичен законик, но деградацијата на животната средина и натаму е присутна во голем обем.

„Загадувањето на воздухот предизвикува голема загриженост, заедно со ефективното собирање отпад, ракувањето со отровните депонии и загадувањето на водата. Поефективното спроведување на меѓународните обврски и домашните закони е од суштинско значење за заштитата на човековите права. Со загриженост забележувам дека пристапот до правдата за прашањата за животната средина останува ограничен и ги повикувам властите да ги отстранат практичните и правните пречки за да можат поединците и заедниците ефикасно да ги бранат своите права пред судовите“, рече О‘Флаерти.

Тој го охрабрува усвојувањето на долгоочекуваниот Закон за климата, кој ќе обезбеди правна основа за климатските активности на Северна Македонија според меѓународните обврски, како што е Рамковната конвенција на Обединетите нации за климатски промени.

„Законот треба да се развива на партиципативен и транспарентен начин и да биде усогласен со принципите на човековите права“, кажа О‘Флаерти.