Стотина скопјани со мотори, облечени во костуми и вратоврски во неделата беа дел од глобалниот настан Џентлменско возење (Gentleman’s Ride).

Настанот секоја година се одржува на 24 септември во 600 градови во светот и учествуваат над 93.000 мажи. Целта е да се подигне свеста за машките болести поточно за ракот на проста и ментално здравје.

„Настанот е хуманитарен и секој учесник донира на глобалната страна www.gentlemansride.com а собраните средства преку ‘Фондацијата Мовембер’ се донираат за проекти и истражувања за ракот на простата и ментално здравје. До сега се собрани 4.3 милиони долари, а Скопје како дел од ова глобално движење годинава успеа да допринесе со 2.000 долари“, велат организаторите на настанот.

Ова е втора година Скопје да е вклучен во овој глобален настан. Како и лани и сега се возеше низ главните булевари низ градот од населбата Аеродром до населбата Ѓорче Петров.