Шефот на германската дипломатија, Франк Валтер Штајнмаер, го назначи амбасадорот Јоханес Хајндл за специјален пратеник за Македонија кој треба да посредува во решавањето на политичката криза. Ова попладнево го објави германското министeрство за надворешни работи на својот официјален твитер-профил.

Специјалниот пратеник, како што е објавено, во координација со претставниците на Европската Унија и на САД во земјава ќе посредува во решавањето на кризата.

Јоханес Хајндл е поранешен новинар и дипломат. Од 2015 година е амбасадор на Германија во Виена, Австрија.

„Министерот за надворешни работи Штајнмаер назначи специјален пратеник за Македонија. Амбасадорот Хајндл ќе се координира одблиску со претставниците на ЕУ и на САД за поддршка на напорите за посредување“, стои во твитот на германското министерство за надворешни работи.

Јоханес Хајндл

https://twitter.com/GermanyDiplo/status/727848989555621888?ref_src=twsrc%5Etfw

Министерот Штајнмаер на 14 април даде изјава во врска со развојот на кризата во Македонија.

“Одлуката на македонскиот Претседател на државата за ослободување од кривично-правно гонење на политичари и носители на функции, против кои се насочени обвиненија за драстичното неправилно однесување, им штети на правно-државните стандарди и правниот мир. Оваа одлука е во спротивност со спогодбата од Пржино, која е договорена меѓу македонските партии и ја поткопува работата на Специјалното јавно обвинителство како и неговата задача да ги истражи сите обвинувања во врска со злоупотребата на власта.

Во фокусот сега мора да бидат засилени напори за успешно исполнување на минималните, заедно договорени, предуслови за спроведување на веродостојни избори во блиска иднина“, стои во изјавата на Штајнмаер дадена на 14 април оваа година.