Градоначалникот на Општина Чешиново-Облешево Горанчо Крстев добил известување дека е позитивен на коронавирус, откако заедно со сопругата направил две тестирања на приватните клиники „Систина“ и „Филип Втори“ во Скопје, потврди тој доцна синоќа за државната агенција МИА. Крстев се тестирал откако кон крајот на март бил кај фризерот од Кочани, кој во понеделникот почина од коронавирус на Клиниката за инфективни болести.  Во моментов, Крстев е првиот јавен функционер кој објави дека има коронавирус.

„По информациите дека фризерот е заболен, на своја иницијатива направивме две тестирања со сопругата, при што првиот тест беше негативен, а вториот позитивен. Од 1 април сум во самоизолација, а ги известив и вработените во Општината да ја применат истата мерка. Во моментот немам никакви симптоми за нарушена здравствена состојба, но ќе видиме како ќе биде во наредните денови“, рече Крстев и апелира дека не треба да се создаваат паника и негативни ставови во јавноста за него и членовите на неговото семејство, ниту пак за кој било друг граѓанин кој е позитивен на коронавирусот.

Во меѓувреме матичната лекарка на градоначалниот Крстев, Јасминка Ајтовска, ги повика сите жители на општината да се јават кај своите матични лекари.

„Секој кој во последните 10 дена бил во контакт со градоначалникот или со некој од вработените во Општината да се јави кај својот матичен лекар за понатамошни инструкции и лична заштита. Да не се создава паника. Заболени од коронавирусот нема, но има позитивни од општинската зграда, кои се без симптоми“, рече Ајтовска.