Граѓаните ќе можат да пријават неправилности во врска со вршењето кардиолошки и кардиоваскуларни интервенции, Министерот за здравство Азир Алиу.
Алиу ги повика граѓаните да пријават евентуални неправилности преку алатката Пријавете неправилност, достапна на веб-страницата на Министерството.
„Транспарентноста во секој процес е наш приоритет, така што кон секоја пријава на каква било неправилност во здравствениот систем пристапуваме со максимална одговорност и постапуваме согласно законските процедури. Токму затоа потсетувам дека преку оваа алатка на веб страницата на Министерството, граѓаните можат да пријават и сознанија за евентуални неправилности во врска со кардиолошките интервенции“, рече Алиу.
Пријавувањето е доверливо и по секоја пријава ќе се постапува согласно законските процедури.
Интерната комисија задолжена за изготвување прелиминарна анализа на кардиолошките и кардиоваскуларните интервенции во здравствените установи во државата веќе почна со работа. Наодите од анализата на интерната комисија ќе бидат во најскоро време доставени до стручната комисија составена од странски експерти.
Министерството за здравство испрати допис до јавните здравствени установи да достават податоци за вкупниот број извршени процедури и операции за периодот јануари 2022 – август 2025 година за извршени интервентни кардиолошки процедури, како што се коронарографии и стентирања, васкуларни ангиографии и кардиохируршки/васкуларни операции.
