Инфлацијата во Македонија се намалува побавно отколку во еврозоната бидејќи во државата сè уште постојат силни инфлациски очекувања, односно верување дека цените ќе продолжат да растат, што само по себе ја храни инфлацијата, вели гувернерот на Народната банка, Трајко Славески, во интервју за Радио Слободна Европа.

Според него, овој процес на дезинфлација сепак ќе продолжи и во наредните година до две се очекува стапката на инфлација да се приближи до историските нивоа од 2 проценти.

„Кога велам инфлациски очекувања, мислам на тоа дека постои верување дека цените и натаму ќе растат и самото тоа ја храни инфлацијата само од себе. Тука, да речеме, и производителите очекуваат дека ќе растат цените и се обидуваат да постигнат повисока цена. Граѓаните се приспособуваат, работниците притискаат за повисоки плати и така натаму“, објаснува Славески.

Гувернерот тврди дека на Владата не ѝ одговара висока инфлација за да го полни буџетот преку ДДВ, бидејќи граѓаните се „алергични“ на растот на цените.

„Граѓаните имаат аверзија кон инфлацијата и оние влади и политики коишто ќе испорачаат пониски стапки на инфлација подобро поминуваат на избори. На владата ѝ одговара ниска и стабилна инфлација, затоа што и тие како и приватниот сектор при реализација на политиките, проектите сакаат предвидливост“, додава Славески.