Премиерот Христијан Мицкоски за незаинтересираноста на ИТ-кадарот да работи во јавниот сектор поради неспоредливо помалите плати во однос на приватниот сектор, денеска кажа дека сè уште има патриоти информатичари кои работат во државните институции и за такви помали плати.

На новинарско прашање по симулацијата на сајбернапад и справување со него во касарната Гоце Делчев – како ќе ги привлече државата ИТ-експертите да работат во јавниот сектор со такви плати, Мицкоски одговори:

„Ова е голем предизвик за државните институции, зашто има начин како се врши исплатата. Но, еве сè уште има такви патриоти кои што сакаат да работат за државата и по цена на тоа таа плата да биде многу пониска од таа што ќе ја добијат во приватниот сектор“.

На потпрашање дека има институции како Јавното обвинителство со само 5 информатичари, Мицкоски рече дека навистина недостасуваат, предизвик е и оти на дневна основа се бори владата со овој проблем.

На дополнително прашање дека имаме, на пример, национална агенција за возови со надзорен, со управен одбор кои ги бира Парламентот, а имаме само неколку воза, и на предлог дека ете со згаснување на таквите непотребни агенции може многу пари да се соберат во Буџетот за да има за плата на информатичарите, Мицкоски одговори:

„Не, сега имаме 8 функционални возови, а имавме ниеден. Но, се сложувам со вас, има институции кои во периодот што следи ќе бидат укинати, рационализирани, трансформирани итн. Тој чекор полека го почнавме со економските директори, инспекторатите влегоа во рамки на министерствата, ќе има рационализација и во администрацијата. Има беспотребни тела и органи кои ни вие, а ни ние се уште не ги знаеме и ги учиме и сите ќе бидат рационализирани во периодот што следи“.

Во касарната претходно имаше вежба каде што беше симулиран сајбернапад на дел од институциите на државата, а потоа Кризниот штаб во Владата носеше одлуки што треба да се преземе. Ова е всушност помош од НАТО-партнерите, под координација на Британската амбасада во Скопје.

„Ние имаме една чудна состојба, имаме ‘recovery’, секундарна заштита, односно Центар на податоци или познат како Дата центар, кој што практично служи за поврат на изгубените податоци при сајбер напад, а немаме примарен дата центар и најголемиот дел од институциите и серверите користат ‘outsourcing’ и така се штитат. Односно, да бидам попрецизен, секој се штити како знае и како умее, а не е тоа организиран пристап. Имаме фокус тука ставено да се создаде еден таков примарен центар на податоци или дата центар којшто потоа ќе биде нормално заеднички и поврзан со институциите на државата и ќе можеме на едно место, на една точка и да бидеме поефикасни“, кажа Мицкоски.

Амбасадорот на Велика Британија Метју Лосон кажа дека е задоволен што Обединетото кралство ја поддржува Македонија во борбата против сајбер-нападите, кои влијаат врз стабилноста, економиите на државите и на начинот на живот на луѓето.

„Заедно работиме на моделирање на соодветен одговор на сајбер-нападите. Ова всушност претставува акција на НАТО-сојузници и е заеднички потфат“, кажа тој по симулацијата во касарната Гоце Делчев.

С. К. ДЕЛЕВСКА