Полицијата ноќва ги блокира патиштата кон скопските населби Драчево и Долно Лисиче, поради надојдената Маркова Река по обилните врнежи изминативе денови.

Нивото на реката е критично кај мостовите кои што ги поврзуваат овие места со Скопје, па пристапот до овие населени места, како и до Студеничани, Батинци, Зелениково и останатите во тој регион е можен само преку Јурумлери.

Маркова Река веќе се излеа во Батинци, пред Драчево, каде што се поплавени улици и подруми.

Градоначалникот на Општина Кисела Вода Орце Ѓорѓиевски кажа дека „механизацијата е на терен и нема опасност по населението, силно се работи на враќање на реката во своето корито“.