Судијата Ивица Стефановски го испрашуваше Велибор Манев, еден од четворицата обвинети за грабнување и свирепо убиство на соседот Панче Жежовски во Велес, како и на 14-годишната Вања Ѓорчевска од Скопје.

Тој признава сè што му се става на товар: дека учествувал во договор со останатите обвинети: Љупчо Палевски, Боре Видевски и Влатко Кешишев да киднапираат луѓе и да изнудуваат пари од нивните семејства, признава копал дупки во местото Рудник над Велес со Влатко за да ги чуваат во нив на ноемврискиот студ во 2023 година во земја на минуснинте температури затворени и сами со денови. Признава и раскажува до детали дека купиле опрема, ракавици, маски, мотороли за планираните киднапирања, раскажува до детали што правеле, како ги извршиле двете тешки кривични дела сите заедно, но застанува кај убиствата.

„Додека го одврзував Панче за да го ставам во дупката, дојде Палевски и му испука куршум во главата. Да знаев дека Палчо носи пиштол, немаше да бидам овде”, кажа обвинетиот Велибор Манев, убеден дека киднапирањата на луѓе и држење под земја се помалку ужасни кривични дела.

Иако тврди дека бил шокиран од убиството на Панче, т.е. веќе знаел дека организаторот Палевски има огнено оружје, признава дека тргнале во ново киднапирање во Скопје.

Имале и два неуспешни обида, дури во третиот обид ја киднапирале Вања.

Сето ова Велибор Манев го кажуваше и пред судијата.

Смирен тој си раскажува како по убиството на Панче Жежовски (на 22.11.2023 година) го оставиле крај дупката, а дури ден по убиството на Вања Ѓорчевска се вратиле да го затрупаат со земја.

Одбраната на овој обвинет во врска со неговото соучесништво во грабнувањето и убиството на 14-годиштото девојче од нејзината зграда, пак, е дека мислел оти грабнуваат жена, а не дете. Не видел во темницата. Иако носела школско ранче, тврди дека не видел оти се работи за ученичка во основно училиште.

Со Боре ја киднапирале Вања, ја ставиле и неа во вреќа и му ја дале на Палчо горе над скопското село Бразда. Многу се изненадиле што ја убил веднаш, исто како Панче.

Овој обвинет киднапер на луѓе, извршител на две ужасни кривични дела, треба да одговара и на прашањата на адвокатот на неговиот пријател Боре Видевски.

Потоа ќе сведочи и Видевски, па Кешишев и на крај Љупчо Палевски.

С. К. ДЕЛЕВСКА

• ПРАШАЈТЕ ГО ПАЛЕВСКИ ЗОШТО Е УБИЕНА ВАЊА, СВЕДОЧИ ОБВИНЕТИОТ МАНЕВ
• ПАЛЧО ИСПУКА КУРШУМ ВО ДЕТЕТО И ОТИДЕ ДО КОЛАТА, ИЗВАДИ КОПАЧ, ЛОПАТА И АШОВ, СВЕДОЧИ ОБВИНЕТИОТ ВЕЛИБОР МАНЕВ
• ПРЕД ДА ЈА ГРАБНАТ ВАЊА, ПАЛЧО ПРВО САКАЛ ДА ГО КИДНАПИРА ДИРЕКТОРОТ НА ГРАНИТ, А ПОТОА 38-ГОДИШНА ЌЕРКА НА СОПСТВЕНИК НА ВЕЛЕДРОГЕРИЈА
• НА ПРВИТЕ РЕЧЕНИЦИ ОД СВЕДОЧЕЊЕТО НА МАНЕВ ЗА НАЧИНОТ НА ГРАБНУВАЊЕ НА ВАЊА, НА ТАТКОТО ЃОРЧЕВСКИ МУ СЕ СЛОШИ, СУДИЈАТА ДАДЕ ПАУЗА
• ДОДЕКА ГО СПРЕМАВ ЖЕЖОВСКИ ЗА ВО ДУПКАТА, ПАЛЕВСКИ ОДЕДНАШ МУ ПУКНА ВО СЛЕПООЧНИЦАТА И МИ КАЖА: „ВАКА Е ПОЧИСТО!”, СВЕДОЧИ ВЕЛИБОР МАНЕВ
• ПАЛЕВСКИ ГИ НАТЕРАЛ ДРУГИТЕ ОБВИНЕТИ ДА ИСКОПААТ ДУПКИ НАД ВЕЛЕС ЗА КИДНАПИРАЊЕ ЛУЃЕ, ЗА ДА ГИ СТАВААТ ВНАТРЕ СО ВРЗАНИ ТЕГОВИ НА НОЗЕТЕ, СВЕДОЧИ ВЕЛИБОР МАНЕВ