Дополнително се комплицира состојбата во Вишото обвинителство на Скопје, под кое спаѓа и Обвинителството за огранизиран криминал и корупција и кое е многу важно за секоја власт. Пропадна обидот на Советот на јавни обвинители да назначи раководител на ова обвинителство чие име ќе се запише во Централниот регистер за технички работи (завршни сметки и плати за обвинителите).
По една недела откако Советот ја назначи обвинителката Наташа Крстевска-Цалева да ги врши овие технички работи, таа вчера испратила писмо со кое бара да биде ослободена од обврската.
Пред да го напише писмото, власта предводена од ВМРО-ДПМНЕ упорно ја нарекуваше незаконски в. д. Виш јавен обвинител на Скопје, на местото на суспендираниот Мустафа Хајрулахи, иако таа е само техничка раководителка на тоа обвинителство, додека не заврши дисциплинската постапка против Хајрулахи.
Крстевска-Цалева смета дека е нова во Вишото обвинителство Скопје и не е за раководителско место, Државниот обвинител Љупчо Коцевски пак, дека баш поради својата неутралност, и треба да биде привремена раководителка. Била предложена затоа што е последен избран виш обвинител и затоа што како што рече, не била дел од нарушените односи во обвинителството.
За во Централниот регистер треба име на раководител за да потпише завршна сметка и плати за обвинителите во обвинителството.
Од 11 обвинители во ВЈО Скопје, четворица се од поранешното Специјално јавно обвинителство, кое актуелната власт не може да ги смисли и секој ден го повторува тоа. Покрај Хајрулахи, суспендиран е и обвинителот Јове Цветановски. За нов раководител не може да го сметаат ни обвинителот Сашо Рајчев, кој е скаран со Хајрулахи.
Крстевска-Цалева си поднесе оставка, па оттаму новата раководителка ќе треба да се одбере меѓу: Снежана Бундалевска-Георгиеска, Наташа Гоџоска и Наташа Сарамандова.
Наташа Крстевска-Цалева во писмото навела дека оставката е затоа што е избрана во Вишото обвинителство пред неколку месеци и сака да се фокусира на работење на предмети. Препорачува дека Советот треба друг обвинител со поголем стаж во ВЈО да биде назначен за привремен раководител.
Коцевски денеска одби да одговори дали обвинителката се исплаши поради притисокот од власта која ја почна постапката за негово разрешување од позицијата државен обвинител.
Коцевски рече дека за времен раководител на Вишото јавно обвинителство ја предложил Наташа Крстевска Цалева затоа што е последен избран виш обвинител и не била дел од нарушените односи во обвинителството.
Претседателката на Советот на Јавни Обвинител Душица Димитриевска рече дека одлуката ќе биде донесена на наредната седница и не прецизираше кој обвинител ќе раководи со Вишото скопско обвинителство дотогаш.
Поради одредувањето на Крстевска-Цалева за привремен раководител, владата покрена иницијатива за разрешување на Коцевски, а на денешната владина седница треба да се расправа за извештајот подготвен од Министерството за правда.
С. К. ДЕЛЕВСКА
