Бугарската министерка за надворешни работи Екатерина Захариева вели дека одбележувањето на 40-годишнината од смртта на Јосип Броз Тито од страна на Град Скопје е исто како градоначалникот на Берлин да прославува годишнина од смртта на Хитлер, во интервју за германскиот весник „Велт“. Захариева нешто слично кажа и на 15 ноември, кога скопскиот градоначалник Петре Шилегов и одговори дека зборува глупости.

„Тие беа многу брутални кон мене кога се осмелив да го искажам моето незадоволство од прославата на 40-годишнината од смртта на еден од најмрачните диктатори – Тито. Тој уби 1,7 милиони луѓе во поранешна Југославија за помалку од десет години. И тие сè уште го слават. Градоначалникот на Скопје е партиски другар на Заев. И по таа изјава, јас веќе не бев популарна таму. Но, тоа би било исто како градоначалникот на Берлин да добие идеја да прославува годишнина на смртта на Хитлер“, кажа Захариева во денешното интервју.

Во Скопје немаше никакво официјално одбележување на 40-годишнината од смртта на Тито, а ниту е познато е од каде Захариева дошла до бројката од 1,7 милиони убиени луѓе во поранешна Југославија за помалку од десет години.