Компанијата на канадско-американскиот бизнисмен со македонско потекло, Крис Павловски „Рамбл Клауд“ отвори претставништво во Македонија, објави БИРН.

Станува збор за компанија која што има своја видео платформа со истото име, а хостира и други платформи, меѓу нив и социјалната мрежа на американскиот претседател Доналд Трамп „Трут Соушл“. Платформата „Рамбл“, која е алтернатива на „Јутјуб“, е популарна во САД меѓу конзервативците и десничарите.

Претставништвото во Македонија е регистрирано на адреса во центарот на Скопје, а нејзини управители се Павловски и финансискиот директор на „Рамбл“ Брендон Александроф.

Павловски е близок со неколку важни луѓе од администрацијата на Трамп, како Девин Нунез, кој беше назначен за претседавач на Советодавниот одбор за разузнавање на претседателот, како и секретарот за трговија Хауард Лутник.

Тројцата дојдоа во Скопје на средба со премиерот Христијан Мицкоски набрзо по изгласувањето на новата влада летоска.

По средбата, министерот за информатичко општество и дигитална трансформација Стефан Андоновски рече дека разговарале за партнерство со „Рамбл“ во врска со „изградба на современи национални центри за податоци“.

Мицкоски потоа се сретна со Павловски и во Вашингтон пред инаугурацијата на Трамп во јануари.

Како што објави БИРН, Павловски од претходно е присутен во македонскиот бизнис преку друга своја фирма, „Космик Девелопмент“. ИТ компанијата почнa да работи во 2013 година прво во Битола, а сега има канцеларии и во Скопје.