За година или година и пол ќе биде воведен електронски индекс на Универзитетот „Св. Кирил и Методиј“ (УКИМ) во Скопје, најави ректорката проф. д-р Биљана Ангелова, пред отворањето на научната конференција „Новите предизвици во високото образование и синдикалното движење“ која денеска ја организираше Сојузот на синдикати на УКИМ за пет години од неговото основање.

Ректорката рече дека УКИМ овој месец почнува со целосна дигитална трансформација. Најпрво ќе ги дигитализира сите студентски сервиси и планот е до почетокот на учебната 2025/2026 основните сервиси да бидат целосно завршени, а процесот ќе биде заокружен со воведувањето електронски индекс.

„Ова е процес што ќе трае. Мојата претпоставка е дека во текот на една година или година и половина, овој процес може да се заокружи, но УКИМ влегува во овој процес и тоа е наш приоритет, кажа проф. д-р Ангелова.

Ректорката рече дека работат и на квалитетот на наставата и на истражувањата на Универзитетот.

„Двата процеса се клучни. Целиот фокус во наредниот период ќе биде на тие две работи. Очекуваме дека од дигитализацијата и од подобрувањето на управувањето со квалитетот ќе имаме и подобрување на рангот на самиот универзитет“, рече Ангелова.

Б. НЕСТОРОСКА