1. Граѓаните на Југославија овој месец ќе одбијат да ја платат телевизиската претплата, бидејќи југословенските ТВ студија не се придржуваат на однапред договорената програмска шема. Во четвртокот не го видовме петтото продол­жение од неодамна започнатата мамутска серија “Шест лица ја бараат Југославија”. Како што објасни еден од статистите, Момир Булатовиќ, кому токму сега сце­нариото му даваше шанса да се истакне со малку посолидна улога, до одлагањето на емитувањето на петтата епизода дошло затоа што во истиот термин во Собранието на Југославија зборуваше Борисав Јовиќ. Така, во времето кога нестриливо го очекувавме продолжението на омилената сапунска опера, во која јунаците безуспешно трагаат по изгубената Југославија во сите туристички локалитети каде што покојниот претседател оставил свои вили, експозето на Јовиќ ни дојде како ЕПП или како интермецо “до следната емисија”.
Тоа беше добра шанса Јовиќ да се покаже во поинакво светло, бидејќи добро го запаметивме како човек што ни се појавуваше секоја вечер пред спиење и не “вадеше од памет”, не оти граѓанската војна веќе почнала да се води во нашите станови. Она што успеа да ни го докаже е дека на неговата превртливост ѝ нема крај. По историското “давам – не давам оставка”, тој завчера во сојузното со­брание, верувале или не, го рече и ова: “Во расплетот на југословенската криза не можат да се игнорираат еднодушните предупредувања на сите релевантни меѓународни фактори – Европската заедница и сите нејзини членови, САД и Советскиот Сојуз, соседните земји, како и другите значајни политички и фина­нсиски меѓународни субјекти…” Тоа е истиот Јовиќ кој пред еден месец го прогласи Анте Марковиќ безмалку за шпион на ЦИА, го обвини за распродажба на земјата и се жестеше да му пишува писмо на Џорџ Буш, бидејќи неговата поддршка на програмата на СИС била најгрубо мешање во внатрешните работи на Југо­славија.

2. Со него никогаш не си начисто. Исто како што не можеш да ја предвидиш политиката што му ја подготвува главниот креатор Милошевиќ, затоа не ни преостанува ништо, освен секој ден да очекуваме нешто ново и по правило – нелогично. На што ќе мора да се навикнеме. Откако собраа искуства од странство – Милошевиќ од Грција, како да го реши проблемот на малцинствата, а Јовиќ од Турција, како е можно пет века да се владее на Балканот, не ми се верува дека наскоро имаат намера да нé ослободат од своето политичко присуство.
Прво се обидоа да го урнат југословенското претседателство. Потоа го урнаа концептот за референдум за иднината на Југославија. Сé уште не отстапуваат од намерата да ја урнат единствената југословенска институција која функционира – СИС и Анте Марковиќ. А цело време нé лажат дека Србија нема намера да ја растура Југославија. Нека решат конечно: сакаат Југославија или Голема Србија. Или, тоа е една иста работа?

3. Наградното прашање за следната сабота гласи: “Кој има подолг кому­нистички стаж: новото раководство на Социјалдемократскиот сојуз на Македонија или новото раководство на ВМРО-ДПМНЕ? Наградата ќе ја додели ОК на ВМРО-ДПМНЕ од Кавадарци, кој според едно соопштение емитувано во третиот дневник на Македонската телевизија тврди дека во нивната партија нема ниту еден поранешен член на СК, односно КП. Згора на тоа, на комунистите воопшто не им бил дозволен прием во ВМРО-ДПМНЕ.
Во меѓувреме, додека комунизмот во Македонија изумира (освен оној дел што од СКМ премина во СК – Воено движење на Југославија и неколкумина претседатели на општински комитети, како и некои пратеници за кои да ме убиеш не можам да се убедам дека се социјалдемократи), продолжува војната меѓу најнекомунистичките партии во Македонија. Во официјалните контакти во јавноста тие веќе си се нарекуваат “злосторници” и “баба-роги”.
Во соседната република во мода е националното помирување. Тоа како цел го зацрта и ВМРО-ДПМНЕ. Со нетрпение чекам кога ќе се прегрнат македонските баба-роги и македонските злосторници. За помирител им го предлагам Невзат Халили. Како најнеутрална варијанта.

4. Новиот рекламен слоган со кој некои наши туристички работници се претставуваат во светот е: “Ние не ги убиваме туристите, ние се убиваме меѓу себе”.
Во Неум, согласно со моралните принципи на новата босанко-херцеговска власт, ова лето, на оние туристи, кои жедни за авантура ќе допатуваат кај нас, ќе им биде забрането да се сончаат по топлес. Сега засега, покрај тоа што не смеат да ги шетаат своите голи гради, сепак ќе им биде дозволено да се појавуваат без фереџе.
Во другите делови на Југославија се размислува во туристичкиот аранжман да се вклучи и изнајмување на панцирни елеци. Ќе бидат добредојдени за присуство на претставите на националните и меѓунационалните помирувања ширум Југославија.
Во Македонија, пак, дозволено е целосно соголување. Убаво е за очи, а и туристите ќе се вклопат во природниот амбиент. И ние и тие ќе шетаме голи и боси.