На Анџела Карини од Италија не ѝ се допаѓа во што се претвори разговорот за олимпискиот женски бокс. Таа беше исфрлена за 46 секунди од првата борба во четвртокот, но за италијанскиот весник „Газето дело спорт“ изјави дека ѝ е жал за победничката, Имане Хелиф од Алжир, која се соочила со непријатни прашања и шпекулации за нејзиниот пол и медицински статус како дел од бранот дебата на интернет. Карини го прекина дуелот против Алжирката Имане Хелиф по само 46 секунди, што предизвика големи контроверзи на Олимписките игри во Париз.
Хелиф е една од двете боксерки на кои им беше дозволено да настапат на ОИ откако беа дисквалификувани од Светското првенство за жени минатата година зашто паднаа на тестовите за тестостерон и родова подобност иако се од женски пол. Лин Ју-тинг од Тајван е втората боксерка која ќе настапи на женскиот турнир на ОИ откако тестовите на ланското Светско првенство покажале дека има машки хромозоми.
По мечот, Карини кажа дека се повлекла зашто никогаш во кариерата не примила така силни удари. Сега Карини рече дека била тажна што загубила, со што го заврши својот олимписки натпревар. Рече дека не чувствувала оти Хелиф направила ништо лошо со тоа што ја победила.
„Сета оваа контроверзност секако ме растажи, а исто така ми беше жал за мојата противничка, таа немаше никаква врска со тоа и како мене беше тука само да се бори“, рече Карини.
Таа додаде дека со тоа што не се ракувала со Хелиф откако одлучила да се откаже не сакала да го коментира нејзиното учество на турнирот во категоријата до 66 килограми.
„Тоа не беше намерно, всушност ѝ се извинувам на неа и на сите“, рече Карини. „Бев лута, бидејќи мојата Олимпијада пропадна. Немам ништо против Хелиф и напротив, ако се сретнам со неа повторно, би ја прегрнала“.
Финишот, официјално прогласен за напуштање на меч, ја поттикна дискусијата за тоа дали Хелиф и Лин Ју-тинг од Тајван треба да се натпреваруваат откако беа дисквалификувани пред крајот на светските првенства во 2023, преклопувајќи се во пораспространети расправии за полот во спортот. Меѓународната боксерска асоцијација (ИБА), која не го раководи олимпискиот бокс поради жестокиот спор со Меѓународниот олимписки комитет (ИОК), оваа недела соопшти дека тестовите покажале оти Хелиф и Лин имаат предности во однос на другите жени. Но, не прецизираше кои тестови се користени освен што кажа дека не се тестови за тестостерон.
Тоа доведе до ширење на „лажни информации“ за спортистките, соопшти МОК, додавајќи дека Хелиф и Лин биле соодветно одобрени да се натпреваруваат во Париз користејќи пасоши и други медицински сертификати, истите методи што се користеа за нивно одобрување за учество на Игрите во Токио во 2021 и на многу други меѓународни натпревари.
Карини, која претходно изјави дека не се противела да се соочи со Хелиф во борбата, изјави за „Газета дело спорт“ дека се обидела да се изолира од контроверзноста. Но, на прашањето дали се чувствува манипулирана од оние што ја користат борбата за да се расправаат за родовите прашања, таа рече: „Тоа е прашање на кое не сакам да одговорам. Замислувам дека многу луѓе ме поддржаа затоа што како мене веруваа во мојот олимписки сон, во мојата желба да освојам медал за тато, кој повеќе не е со нас. Тоа е се.”
