Јоханес Хесфлот Клебо ја предводеше Норвешка до победата на екипниот спринт и го освои своето петто злато на Зимските олимписки игри во Милано и Кортина. Дваесет и деветгодишниот Клебо со тоа стана првиот спортист во историјата со десет злата од зимските олимпијади.

Клебо, кој трчаше заедно со Еинар Хедегарт, истовремено го израмни рекордот на американскиот натпреварувач во брзо лизгање Ерик Хејден, кој досега беше единствениот спортист со пет титули од една олимпијада.

Клебо ги освои првите три злата на Игрите во Пјеонгчанг во 2018, а четири години подоцна во Пекинг се закити со уште две олимписки титули. Таму освои и едно сребро и една бронза, со што сега има вкупно 12 олимписки медали.