Ривер плејт по четврти пат ја освои Копа Либертадорес, по првото Суперкласико во историјата на јужноамериканската Лига на шампиони.

Во реваншот од финалето, што принудно се играше на „Сантјаго Бернабеу“ во Мадрид, Ривер го совлада својот лут ривал Бока џуниорс со 3:1 по пресврт, драма и продолженија.

Бока поведе во самиот финиш на првото полувреме преку Бенедето, за Прато да израмни во 68. минута, голот што го одведе мечот во продолженијата. Таму, прво Бока остана со играч помалку по исклучувањето на Бариос, а потоа головите на Кинтеро во 109. и на Мартинес во 120. минута ја донесоа историската победа.

По 2:2 на стадионот на Бока, реваншот требаше да се игра на 24 ноември, но мечот беше одложен поради нападот врз нејзиниот автобус од страна на навивачите на Ривер. Три дена подоцна беше решено дека вториот меч воопшто нема да се игра на стадионот „Монументал“, туку надвор од Аргентина и беше избран Мадрид.