Десетици илјади луѓе можеби загинале на францускиот архипелаг Мајот во налетот на моќниот циклон Чидо изминатиот викенд. Досега се потврдени само 22 смртни случаи, но Црвен крст кажа дека околу 100.000 луѓе се водат како исчезнати, вклучувајќи 200 волонтери на организацијата.

Три дена откако циклонот донесе ветрови од 200 километри на час на оваа француска територија во Индискиот Океан, во локалната болница не е регистриран зголемен број повредени, поради што се стравува од најлошото.

„Фактот дека нема толку многу повредени кога видовме дека сѐ се урна во невремето ни кажува дека сите тие луѓе се затрупани и мртви. Очекуваме илјадници, ако не и десетици илјади мртви. Сѐ уште нема опрема за да се извлечат сите тие луѓе од урнатините“, изјави Науел Буабас, лекарка во единствената болница на Мајот, која исто така е оштетена и поплавена во невремето.

Властите веднаш кажаа дека трагичниот биланс би можел да биде стотици, можеби и илјадници мртви. Мајот има околу 320.000 жители, од кои 75% живеат во сиромаштија. Во тамошните импровизирани заедници живеат и бројни нерегистрирани мигранти, за кои се верува дека биле тешко погодени од циклонот.

Буабас смета дека лошите услови за живеење за многумина жители на островите придонесоа за можната голема бројка на жртви, а сега се стравува и од ширење на заразни болести.

„Луѓето се веќе гладни и жедни и веќе пијат валкана вода. Стравуваме дека најтешкото допрва доаѓа“, рече таа.