Американскиот државен секретар Марко Рубио планира да се сретне со руски функционери во Саудиска Арабија во следните денови за да разговараат за крај на војната во Украина. Тој ќе биде придружуван од советникот за национална безбедност Мајк Волц и специјалниот претставник на САД за Блиски Исток, Стив Виткоф. Засега е нејасно кој ќе ја претставува Русија.
Володимир Зеленски кажа дека Украина не е поканета на разговорите во Саудиска Арабија.
„Целта на разговорите во Саудиска Арабија е да се договори средба помеѓу Доналд Трамп, Владимир Путин и Володимир Зеленски“, изјави американскиот конгресмен Мајкл Мекол за време на Минхенската безбедносна конференција, која завршува денеска.
Специјалниот претставник на Трамп за Украина, Кит Келог, вчера изјави дека Европа нема да учествува во мировните разговори, поради што европските лидери ќе се сретнат во Париз следната недела, загрижени за мировниот план што би можел да го наметне Трамп. Рубио вчера разговарал со рускиот министер за надворешни работи Сергеј Лавров, при што го уверувал дека Трамп е посветен на изнаоѓање решение за крај на војната во Украина.
Ова следува откако Трамп оваа недела телефонски разговараше со Владимир Путин и Володимир Зеленски, кои му рекле дека се согласуваат мировните разговори да почнат веднаш. Трамп и неговиот министер за одбрана Пит Хегсет потоа порачаа дека Украина не треба да очекува членство во НАТО и враќање во границите пред 2014.
