Најмалку седуммина луѓе загинаа откако мал авион за превоз на пациенти се урна во Филаделфија. Во несреќата загинаа сите шестмина мексикански државјани во авионот и едно лице на земја.

„Лицето што загина на земја било во својот автомобил на местото на несреќата. Има и 19 повредени“, изјави градоначалничката на Филаделфија, Шерел Паркер, додавајќи дека бројот на жртви би можел да расте.

Во паднатиот авион биле четворица членови на екипажот, девојче кое било пациент и нејзината мајка. Девојчето се враќало дома во Тихуана по лекувањето во САД.

Податоците од летот покажаа дека авионот бил само неколку минути во воздух пред да падне. Причината за падот засега не е позната. 

„Областа на ударот опфаќа четири до шест блока. Остатоци од несреќата има на широко подрачје“, кажа Паркер.