Бугарските власти вчера двапати ја менуваа приказната за тоа што се случило со авионот на Урсула фон дер Лајен, за на крајот да се вратат на тврдењата дека имало попречување на ГПС навигацијата, за што Европската комисија претходно ја обвини Русија.

Како што објави „Фајненшл тајмс“ на 1 септември, авионот што ја превезувал Фон дер Лајен до Пловдив не можел да користи електронски навигациски помагала како резултат на пречките, што го принудило пилотот да слета со помош на хартиени мапи

Премиерот Росен Жељазков вчера во бугарскиот парламент кажа дека авионот не бил попречуван, туку искусил делумен прекин на сигналот, што било вообичаено во густо населени места. И вицепремиерот и министер за транспорт Гроздан Караџов негираше дека има докази за напад врз авионот на Фон дер Лајен.

„Според емпириските податоци, радио детектирањето и евиденцијата на нашите цивилни и воени агенции, нема ниту еден факт што го поддржува тврдењето за блокирање на ГПС сигналот на авионот“, кажа Караџов.

Но, само неколку часа подоцна, владата повторно ја промени својата позиција, враќајќи се на официјалната верзија со електроничко војување поврзано со Украина.

„Дојде до хаос од информации, со прашања, факти и околности толкувани на начин за да им се наштети на бугарските институции“, рече Жељазков на прес-конференција.

Тој додаде дека тоа што инструментите на земјата не откриле никакво попречување не значи дека уредите во авионот не го откриле.

Во изминатите денови, аналитичарите ги доведуваа во прашање деталите за инцидентот, посочувајќи ги податоците од следењето на летот кои откриваат дека ГПС сигналот никогаш не бил изгубен и дека слетувањето било одложено само за девет минути. Јавните податоци, исто така, покажаа дека истиот авион доживеал блокирање на ГПС претходниот ден над Балтикот, но не и во Бугарија.