„Часовникот на судниот ден“, кој симболично покажува колку е блиску светот до уништување, е поместен нанапред за една секунда и сега е на 89 секунди до полноќ, најблиску што бил досега.

Групата Билтен на атомските научници (БАС), која раководи со часовникот, кажа дека нуклеарните закани, потенцијалните злоупотреби на напредокот на биологијата и вештачката интелигенција, како и климатските промени се клучните причини за поместувањето.

„Последното поместување е предупредување за сите светски лидери“, изјави претседателот на БАС, Даниел Холц.

Овој проект почнал во 1947 година за да го предупредува човештвото на опасносните од нуклеарна војна. Стрелките се поместуваат врз основа на анализите на егзистенцијалните закани во одредено време. Полноќ ја означува теоретската точка на уништувањето. Стрелките беа најдалеку од полноќ на крајот на Студената војна – 17 минути.

„Бидејќи светот е веќе опасно блиску до пропаст, поместувањето макар и од една секунда треба да се сфати како показател за екстремна опасност и непогрешливо предупредување дека секоја секунда одложување во враќањето на курсот ја зголемува веројатноста за глобална катастрофа“, објави БАС.