Дојде денот на ослободувањето, напиша Доналд Трамп на својата социјална мрежа, алудирајќи на својата најава дека денеска ќе објави нови царини за бројни држави. Засега не се знаат деталите и дали царините еднакво ќе ги погодат сите држави, но јасно е дека тие ќе имаат големо влијание врз светската економија, ќе ја засилат трговската војна и ќе ги покачат цените.

Белата куќа одби да коментира дали Трамп ќе воведе универзални царини од 20%.

Трамп ќе го објави својот економски план вечерва по средноевропско време, на настан во Белата куќа, наречен „Да ја направиме Америка повторно богата“.

„Ова е ден на ослободувањето. Царините ќе ја ослободат Америка од зависноста од странски производи“, кажа Трамп, кој еднаш кажа дека царина е најубавиот збор во речникот.

Новите царини треба да стапат на сила веднаш со нивното објавување, а дополнително, утре ќе почнат да важат и царините од 25% за увоз на автомобили во САД.

Се очекува трговските партнери на САД да возвратат со свои мерки. Европската Унија кажа дека е во состојба на чекање, но веќе има направено анализи за можното влијание на американските царини.

„Нашиот одговор ќе биде во два чекора. Првиот чекор ќе бидат царини за челик и алуминиум, а вториот ќе се однесува на сѐ друго“, изјави портпаролот на Европската комисија, Олоф Гил.

Економистите предупредуваат дека царините би можеле да ја успорат светската економија, да го зголемат ризикот од рецесија и да ги покачат животните трошоци на просечното американско семејство за илјадници долари.