Европска комисија предложи укинување на царините за увоз на американска индустриска стока во замена за намалени американски царини за европски автомобили, што е клучен дел од трговскиот договор што ЕУ и САД гo склучија минатиот месец.
Ова е првиот чекор на ЕУ во спроведувањето на рамковниот договор помеѓу Доналд Трамп и Урсула фон дер Лајен, со кој Брисел прифати широка царина од 15% за да избегне штетна трговска војна. САД притоа се согласија да ги намалат своите царини за автомобили произведени во ЕУ од 27,5% на 15%, што стапи на сила на 1 август.
Договорот стави крај на конфликтот помеѓу двата најголеми трговски и инвестициски партнера во светот, иако станува збор за асиметричен договор, зашто од Брисел се бара да ги намали своите царини и да купува повеќе енергеси од САД, додека Вашингтон ги задржува царините за 70% од извозот на ЕУ.
Трамп на моменти жестоко ја критикуваше Европската Унија, па во февруари кажа дека таа била „формирана за да ја измами Америка“ и го нагласуваше трговскиот дефицит на САД со ЕУ, кој во 2024 изнесуваше 235 милијарди долари. Повеќето влади на ЕУ изјавија дека го прифаќаат договорот како помало зло, имајќи предвид дека Трамп требаше да воведе царини од 30% за речиси сите увезени стоки од ЕУ.
Влијанието на отстранувањето на царините за индустриски стоки може да биде скромно, зашто за две третини од нив веќе немаше царина. Просечната царина за американските стоки е 1,35%, иако ЕУ наплаќа царина од 10% за автомобили.
