Лидерите на Германија, Франција и Шпанија му порачаа на претседателот на Венецуела Николас Мадуро да распише избори во наредните осум дена, инаку за легитимна власт ќе ја признаат опозицијата.

Мадуро е под притисок на меѓународната заедница откако неговиот ривал Хуан Гуаидо се прогласи за претседател во средата, среде големите протести против актуелната владејачка гарнитура. Неколку земји, меѓу кои и САД, Бразил и Канада, го поддржаа Гуаидо како претседател, додека Мадуро доби поддршка од Кина, Русија и Мексико.

Мадуро притоа го обвини Гуаидо за планирање државен удар и ги прекина сите врски со САД. Тој положи заклетва за втор мандат во почетокот на овој месец, по изборите во мај, кои беа обележани со бојкот на опозицијата и обвинувања за местење.

„Шпанија има одговорност кон Јужна Америка. Не сакаме да менуваме или отстрануваме влади, но сакаме демократија и слободни избори во Венецуела“, кажа шпанскиот премиер Педро Санчес, а слични пораки испратија и Франција и Германија.

Десетици илјади луѓе протестираа поради економската криза во земјата, проследена со инфлација од 1.300.000% минатата година.