По вонредниот самит на европските лидери во Лондон за војната во Украина, британскиот премиер Кир Стармер изјави дека секој нов договор за поддршка на Киев мора да биде заснован на сила, а секоја нација мора да придонесе на најдобар начин, преземајќи одговорност и зголемувајќи го својот дел.
Стармер рече дека лидерите на самитот се согласиле за четири важни чекори:
- Континуирана воена помош за Украина додека војната трае и зголемување на економскиот притисок врз Русија.
- Траен мир мора да ја гарантира сувереноста и безбедноста на Украина, а Украина мора да биде на масата за какви било мировни преговори.
- Во случај на мировен договор, европските лидери ќе се стремат да одвратат каква било идна инвазија на Русија во Украина.
- Ќе има „коалиција на подготвени” за да ја бранат Украина и да гарантираат мир во земјата.
Францускиот претседател Емануел Макрон испрати порака преку социјалните мрежи во врска со денешните разговори во Лондон. Објавувајќи фотографија од сите лидери кои учествуваа на самитот, Макрон напиша:
„На масата во Лондон, сите сме решени да преземеме акција за силен и траен мир во Украина и да ја обезбедиме нашата колективна безбедност”.
Италијанската премиерка Џорџа Мелони, во разговор со италијански новинари по состанокот, ги пофали разговорите за „многу деликатна и комплексна” ситуација, велејќи дека клучна цел за неа е да не се дозволи Западот да биде поделен во пристапот кон решавање на кризата.
Таа го пофали украинскиот претседател Володимир Зеленски за неговата „рационална” анализа и покрај експлозивниот состанок во Овалната соба во петокот, и рече дека тој бара решенија за оваа ситуација.
Мелони додаде дека сѐ уште нема конкретен план за испраќање војници во Украина, туку има општи идеи за кои ќе се разговара дополнително. Таа потврди дека нема планови за испраќање италијански војници во Украина.
Полскиот премиер Доналд Туск се огласи на платформата „Икс“, објавувајќи „Европа се разбуди”, заедно со фотографија од лидерите на самитот одржан денеска.
Туск вели дека на масата „сите зборуваат со еден глас за помош на Украина, потребата од блиска трансатлантска соработка и зајакнување на источната граница”.
