Милитантите од Газа ослободија уште осуммина заложници денеска и се очекува Израел во замена да пушти на слобода 110 палестински затвореници. Меѓу ослободените заложници е и припадничката на израелската војска Агам Бергер.

Ослободувањето беше одложено поради хаотичната сцена во која толпа Палестинци ги опкружи и исмејуваше заложниците додека беа предавани на Црвен крст во јужниот град Хан Јунис пред уништениот дом на убиениот лидер на Хамас, Јахја Синвар.

Оваа група заложници вклучи 80-годишен Израелец и петмина тајландски државјани. Израелската војска потврди дека ослободените заложници се веќе во Израел.

Бергер е една од петте млади припаднички на израелската војска кои беа киднапирани на 7 октомври 2023. Останатите четири беа ослободени во саботата.

Од Палестинците кои во оваа тура ќе бидат пуштени од израелските затвори, 30-мина служеа доживотна казна за смртоносни напади врз Израелците.

Уште тројца заложници, сите мажи, треба да бидат ослободени в сабота.