Канадскиот премиер Марк Карни распиша предвремени избори за 28 април, со што го означи почетокот на изборната кампања која според очекувањата ќе се фокусира на затегнатите односи со САД и заканите за економската и политичката иднина на Канада.

Карни вели дека му е потребен јасен и позитивен мандат за да се справи со Доналд Трамп и да создаде економија од која ќе имаат корист сите.

Тој признава дека неговата генерација имала среќа, додека помладите денес мораат да работат исто толку напорно, но се мачат да си дозволат кирија и да штедат за иднината на своите деца.

„Се соочуваме со најзначајната криза на нашите животи поради неоправданите трговски дејствија на претседателот Трамп и неговите закани за нашиот суверенитет“, рече тој.
„Тој сака да нè скрши, за Америка да може да нè поседува. Нема да дозволиме тоа да се случи. Го надминавме шокот од предавството, но никогаш не смееме да ги заборавиме лекциите. Мора да се грижиме за себе. Мора да се грижиме едни за други“, додаде Карни.

Непосредно пред соопшти дека ќе има предвремени избори, Карни се сретна со генералната гувернерка Мери Сајмон, барајќи од неа да го распушти 44-от парламент во земјата и да распише избори. Според федералниот закон, минималното времетраење на кампањата е 37 дена.

Одлуката на Карни доаѓа во време кога неговите Либерали доживуваат невиден пораст на рејтингот во анкетите, што сега ги стави пред Конзервативците, при што некои предвидуваат дека партијата има доволно поддршка на национално ниво за да формира мнозинска влада.

Пред распуштањето на парламентот, Либералите имаа 152 места во Претставничкиот дом. Конзервативците имаа 120, Блокот Квебекоа 33, НДП 24 и Партијата на зелените два.