Кина објави дека воведува нови царини за САД од 34%, што ќе почне да се применува од 10 април. Ова е одговор на одлуката на Доналд Трамп, кој пред два дена ги зголеми царините за увозот од Кина на 54%.

Кинеското министерство за финансии тогаш кажа дека новите американски царини не се во согласност со меѓународните трговски правила и најави одмазднички мерки, што дополнително ќе ја засили глобалната трговска војна. Кина истовремено поднесе тужба во Светската трговска организација.

Трамп пред два дена воведе нови царини на целиот увоз во САД, задавајќи ѝ го најголемиот удар на меѓународната трговија по Втората светска војна. Неговиот економски план предвидува основна, најниска царина од 10 отсто, но производите од 60-ина трговски партнери, кои Белата куќа ги нарече најголеми престапници, како ЕУ и Кина, се соочуваат со поголеми давачки. Новите царини од 10% ќе почнат да се наплатуваат од 5 април, а повисоките царини за одредени држави на 9 април.

Европската Унија исто така најави дека подготвува одговор, но нема да брза.

„ЕУ ќе одговори на мирен, внимателно испланиран и унифициран начин. Сакаме да им дадеме шанса на преговорите за да се најде фер договор во корист на двете страни“, изјави еврокомесарот за трговија Марош Шевчович.

Американските компании изгубија трилиони долари од својата вредност откако Трамп објави нови царини за целиот странски увоз. Речиси сите сектори претрпеа големи загуби, додека американските финансиски пазари го забележаа најголемиот пад во еден ден од пандемијата на ковид-19 пред пет години.