Емануел Макрон не ја прифати оставката на премиерот Габриел Атал и побара од него да остане на функцијата и по парламентарните избори, на кои победи левичарската коалиција, но никој не освои мнозинство.

„Претседателот го замоли Габриел Атал да остане премиер уште некое време за да се обезбеди стабилноста на земјата“, кажаа од кабинетот на Макрон.

Последните податоци кажуваат дека Нов народен фронт (НПФ) ќе има 182 пратеници, сојузот Заедно на Макрон 168, а Националниот собир (РН) и сојузниците 143, што ќе го подели парламентот на три големи блока со значително различни платформи и без традиција да соработуваат.

Триесет и четиригодишниот Атал оваа година стана најмладиот премиер во историјата на Франција и синоќа најави оставка по објавувањето на резултатите на изборите.

Од НФП денеска побараа од Макрон да им даде мандат да именуваат нов премиер. Оливје Фор, лидерот на Социјалистите, кои се дел од коалицијата, изјави дека блокот би можел да избере кандидат за премиер во рок од една недела.