Џорџа Мелони кажа дека се наоѓа под истрага откако Италија минатата недела неочекувано ослободи либиски генерал баран за воени злосторства од Меѓународниот кривичен суд. Италијанската премиерка објави видео во кое кажа дека е осомничена за помагање и поттикнување на криминал и проневера во врска со случајот со началникот на либиската судска полиција Осама Наџим попознат како Алмасри.
„Она што е валидно денеска беше валидно и вчера: не можете да ме уцените и да ме заплашите“, кажа Мелони.
Римскиот обвинител Франческо Ло Вои исто така покренал истрага против министерот за правда Карло Нордио и министерот за внатрешни работи Матео Пјантедози. Истрагата била отворена по тужбата поднесена од адвокатот Луиџи Ли Готи.
Италија предизвика контроверзи откако го ослободи Наџим минатата недела, кој е баран за воени злосторства, злосторства против човештвото, силување и убиство. Тој беше уапсен во Торино врз основа на меѓународна потерница, но неочекувано беше пуштен и брзо беше вратен во Либија, каде што доби херојски пречек.
