Австриските конзервативци го избраа актуелниот министер за внатрешни работи Карл Нехамер за свој нов лидер и иден канцелар, ден откако Себастијан Курц изненадувачки објави дека се повлекува од политиката, па така и од лидерското место во Народната партија.

Четириесет и деветгодишниот Нехамер ќе ја води коалициската влада со Зелените и ќе се обиде да ја извлече партијата од хаосот што настана откако Курц се повлече од канцеларската позиција во октомври поради обвинувањата за корупција. Нехамер кажа дека планира да ја продолжи политиката што ја водеше Курц во двата мандата.

„Како лидер на Народната партија, за мене е важно да останеме на тие линии, особено по прашањата на мигрантите и азилот“, изјави Нехамер, додавајќи дека борбата против пандемијата ќе биде главен приоритет.

Александер Шаленберг, кој привремено беше канцелар, треба да се врати на функцијата министер за надворешни работи.