Доналд Трамп објави дека американски, руски и украински функционери ќе се сретнат денеска на Безбедносната конференција во Минхен за да разговараат за крај на војната во Украина.
„Русија ќе биде таму со свои луѓе. Украина исто така е поканета, не знам кој точно ќе дојде од секоја земја, но ќе има високорангирани луѓе од Русија, Украина и САД“, кажа Трамп.
Русија официјално не е поканета на годишниот форум во Минхен и не ги коментираше наводите на Трамп, додека висок украински функционер изјави дека не се очекуваат разговори со Русите во Минхен.
Ова следува само два дена откако Трамп телефонски разговараше со Владимир Путин и Володимир Зеленски и објави дека мировните разговори за Украина почнуваат веднаш. Трамп ги опиша разговорите како одлични и додаде дека „има добри шанси да се стави крај на оваа ужасна, крвава војна“. Притоа нагласи дека Украина не треба да очекува членство во НАТО и враќање во границите пред 2014, што многумина го критикуваа како правење отстапки на Путин уште пред да почнат преговорите.
Трамп не откри детали за тринасочниот состанок во Минхен. Советникот на Зеленски, Дмитро Литвин, кажа дека украинската делегација не планира да присуствува на таков состанок. Најавено е дека Зеленски во Минхен ќе се сретне со американскиот потпретседател Џеј Ди Венс и со државниот секретар Марко Рубио.
Зеленски предупреди дека Украина нема да прифати никаков мировен договор ако и самата не учествува во преговорите и дека не треба целосно да му се верува на Путин кога вели дека сака мир.
