Мјанмарската воена хунта ги одби предлозите за примирје од бунтовничките групи, со цел да се овозможи достава на помош по земјотресот кој ја погоди земјата минатата недела. Водачот на воената хунта генералот Мин Аунг Хлаинг објави дека продолжуваат со воените операции, додека бројот на загинати порасна на 2.886, над 4.600 луѓе се повредени, а 400 се водат како исчезнати.

Опозициската Влада на национално единство, востановена од соборените пратеници по воениот пуч во 2021, прогласи двонеделно примирје, кое почна на 30 март. Сличен предлог дадоа уште три војски кои се борат во Мјанмар.

Сепак, Хлаинг ги обвини бунтовничките групи дека сакаат да го искористат прекинот на огнот за прегрупирање и спроведување воена обука.

„Некои етнички вооружени групи можеби не водат борби во моментов, но се собираат, обучуваат и се подготвуваат за напади. Бидејќи ова е форма на агресија, војската ќе продолжи со неопходните дефанзивни операции“, изјави Хлаинг.

Во Мјанмар се води граѓанска војна од пучот во февруари 2021, при што воената хунта се бори против неколку вооружени етнички групи и продемократски сили.

Кинескиот Црвен крст кажа дека војниците испукале предупредувачки куршуми кон негов конвој со помош, што ги нагласува проблемите со кои се соочуваат хуманитарните напори по земјотресот. Руралните делови на тешко погодениот регион Сагаинг се под контрола на бунтовниците, па меѓународните групи за помош велат дека доставувањето на хуманитарната помош се соочува со големи предизвици, имајќи ги предвид ограничувањата од режимот.

Обединетите нации кажаа дека над 28 милиони луѓе од шест региони се погодени од земјотресот и дека ситуацијата останува критична.