Новиот ирански врховен водач Моџтаба Хамнеи сѐ уште заздравува од сериозните повреди на лицето и ногата, со кои се здобил во воздушниот напад во кој загина и неговиот татко Али Хамнеи, изјавија за „Ројтерс“ три лица блиски до неговиот најтесен круг. Тие исто така кажаа дека лицето на Хамнеи е изобличено и дека има значајни повреди на една или на двете нозе.

И покрај повредите, 56-годишниот Хамнеи останува ментално остар и учествува во состаноците со високи функционери преку аудиоконференциски повици и во донесувањето важни одлуки, рекле изворите.

Хамнеи не се појавил во јавност откако беше избран за врховен водач на 8 март, туку само повремено се огласуваше преку пораки објавени од медиумите. Каде се наоѓа и какви се неговите состојба и способност да владее останува мистерија за светот, ниту се објавени фотографија, видео и аудиоснимка од него.

Хамнеи беше ранет на 28 февруари, на првиот ден од војната што ја започнаа САД и Израел, во нападот во централен Техеран во кој беа убиени неколкумина членови на неговото најблиско семејство.