Молдавија мора да се придружи на Европската Унија, инаку нема да преживее руска агресија, изјави претседателката Маја Санду.

Бившата советска република, која има 2,4 милиони жители и дели граница од 1.200 километри со Украина, стана мета на руска хибридна војна, вклучувајќи дезинформации, сајбернапади и изборни манипулации.

„Токму затоа, нашиот европски пат не е само прашање на вредности, туку и прашање на опстанок. Кремљ го користи целиот свој арсенал на хибридни напади против нас. Се соочуваме со хибридна војна со размер невиден пред инвазијата врз Украина. Русија е најголемата закана со која се соочуваме“, изјави Санду.

Молдавците ќе гласаат на парламентарни избори на 28 септември и Санду смета дека Кремљ ќе се обиде да влијае врз нив.

Минатогодишниот референдум за членство во ЕУ помина тесно, 50,4% наспроти 49,6% и бил обележан со руско мешање. Паралелно се одржаа и претседателските избори, на кои Санду го победи прорускиот кандидат во вториот круг.

„Целта на Москва е јасна: да се освои Молдавија преку гласачки ливчиња, да ја искористи против Украина и да ја претвори во отскочна штица за хибридни напади врз Европска Унија“, рече Санду.

Молдавија аплицираше за членство во ЕУ во 2022 и спроведе низа политички, економски и судски реформи. Лидерите на Полска, Германија и Полска го посетија Кишињев минатиот месец за да ѝ дадат поддршка на Санду.