Повеќе луѓе се убиени во синагога во Питсбург, откако вооружено лице отворило оган за време на редовна саботна служба.

Напаѓачот, кој додека пукал извикувал „сите Евреи мора да умрат“, ѝ се предал на полицијата, по што повреден бил превезен во локална болница. Неговиот идентитет не е објавен, но локални медиуми кажаа дека станува збор за 48-годишен белец, кој дејствувал сам. Властите кажаа дека има и 12 повредени, од кои тројца се полицајци.

Иако бројката на мртви официјално не е потврдена, „Си-Би-Ес Питсбург“ објави дека има најмалку осум загинати.

Пукањето се случи во една од најголемите еврејски заедници во Пенсилванија. Синагогата била преполна со луѓе во моментот на пукањето.

„Ова пукање е ужасна, ужасна работа. Срамота е што гледаме како ова постојано се повторува толку многу години“, изјави Доналд Трамп, опишувајќи го напаѓачот како манијак.