Најновата кинеска подморница на нуклеарен погон потонала во првата половина на оваа година, изјави висок функционер од американското министерство за одбрана, што би можел да биде голем удар за Пекинг додека се обидува да ги прошири своите воени способности.
Тој кажа дека подморницата од прва класа потонала додека била во пристаниште близу Вухан некаде меѓу мај и јуни. Не е познато што довело до потонувањето и дали во тој момент имало нуклеарно гориво во неа.
„За ова се дозна благодарение на сателитски снимки, и покрај напорите на комунистичките власти да го заташкаат инцидентот. Се верува дека подморницата била покрај пристаништето кога потонала“, изјави овој функционер.
Според „Вол стрит џурнал“, кој прв ја објави веста, Кинезите успеале да ја извлечат подморницата, но се верува дека ќе бидат потребни месеци пред да биде ставена во функција.
Кина веќе ја има најголемата морнарица на светот, со повеќе од 370 бродови и почна да произведува нова генерација нуклеарни подморници.
