Сите главни американски берзански индекси забележаа пад по денешното отворање на Вол стрит, ден откако Доналд Трамп воведе нови царини за сите држави. Во првите моменти од тргувањето, „Дау Џонс“ падна за 2,8%, „Ес-Пи 500“ за 3,3%, а технолошкиот индекс „Насдак“ за 4,4%.

Меѓу големите компании чии акции изгубија на вредност се „Најки“ (11%) и „Амазон“ (7%).

Доналд Трамп вчера воведе нови царини на целиот увоз во САД, задавајќи ѝ го најголемиот удар на меѓународната трговија по Втората светска војна. Неговиот економски план предвидува основна, најниска царина од 10 отсто, но производите од 60-ина трговски партнери, кои Белата куќа ги нарече најголеми престапници, како ЕУ и Кина, се соочуваат со поголеми давачки. Новите царини од 10% ќе почнат да се наплатуваат од 5 април, а повисоките царини за одредени држави на 9 април.

„Операцијата е завршена! Пациентот преживеа и закрепнува. Прогнозите се дека пациентот ќе биде посилен, поголем, подобар и поотпорен од кога било. Да ја направиме Америка повторно голема“, се огласи Трамп на својата социјална мрежа.

Белата куќа му се обрати на Вол стрит со зборовите да има доверба во Трамп, додека потпретседателот Џеј-Ди Венс кажа дека Американците мора да бидат трпеливи додека САД чекаат да видат какво ќе биде влијанието на новите царини.

„Да, ова е голема промена, но тоа ни требаше. Работите нема да станат подобри прекуноќ, но странските држави веќе нема да ја искористуваат Америка и работните места ќе бидат побезбедни“, кажа Венс.

Аналатичарите велат дека засилувањето на трговската војна ќе доведе до поскапувања и успорен раст во САД, а некои држави низ светот би можеле да паднат во рецесија. Кина и ЕУ веќе најавија контрамерки.