Критична е состојбатa на папата Фрањо, соопшти доцна попладнево Ватикан. Осумдесет и осумгодишниот поглавар на Римокатоличката црква страда од сериозна инфекција на белите дробови повеќе од една недела и на 14 февруари беше примен во римската болница „Џемели“.

Во денешното соопштение се наведува дека добил и трансфузија на крв откако тестовите покажале состојба поврзана со анемија.

„Папата Фрањо денеска беше во критична состојба откако претрпе долга астматична респираторна криза која бараше висок доток на кислород. Папата и понатаму е свесен и го помина денот во фотелја, иако со повеќе болки од вчера. Во моментов, прогнозата е резервирана“, се вели во соопштението.

Претходно, лекарите рекоа дека папата Фрањо се бори со пневмонија и сложена респираторна инфекција поради што ќе остане во болница  уште најмалку една недела.