Организацијата за правата на жените „Terre des Femmes“ предупреди дека суровата практика на осакатување женски гениталии сѐ повеќе се шири во Европа, делумно и како последица на глобалната миграција. Групата процени дека има повеќе од 100.000 жени и девојчиња во Германија чии гениталии се осакатени, а повеќе од 17.000 девојки во земјата се потенцијално загрозени.

„Сакаме да работиме со партнерски организации за да ја подигнеме свеста за овој проблем“, рече Едел Отиено-Окот, експертка во организацијата за правата на децата „Плен интернешнал“.

Таа рече дека има десетици советодавни служби низ Германија кои нудат поддршка за погодените семејства, но и дека е еднакво важно да се подигне свеста кај медицинските и социјалните професионалци за ризиците и како да им се помогне на засегнатите.

„Темата за осакатување на женските гениталии мора да биде вклучена во наставната програма за сите здравствени и социјални професионалци“, рече Отиено-Окот.

„Плен интернешнал“ веќе 20 години води кампања против осакатувањето женски гениталии во неколку африкански земји, како Египет, Етиопија, Буркина Фасо, Гвинеја, Гвинеја-Бисао, Мали и Сиера Леоне.