Американскиот државен секретар Марко Рубио пристигна во Саудиска Арабија во пресрет на очекуваните разговори со руски функционери со цел да се заврши војната во Украина. Ова следува неколку дена откако Доналд Трамп телефонски разговараше со Владимир Путин и Володимир Зеленски, по што им наредил на високите американски функционери да почнат мировни разговори.
Покрај Рубио, во делегацијата на САД ќе бидат и советникот за национална безбедност Мајк Волц и специјалниот претставник за Блиски Исток, Стив Виткоф. Засега не е познато кого ќе испрати Русија.
Руската новинска агенција ТАСС објави дека во Ријад ќе се разговара и за подготовките за средба Трамп-Путин. Се очекува разговорите да се одржат утре, 18 февруари.
Ова ќе биде прва директна средба помеѓу високи функционери на двете земји по повеќе години пауза. Рубио вчера кажа дека следните денови и недели ќе покажат дали Путин е сериозен кога вели дека сака мир во Украина.
Украина не е поканета на разговорите во Ријад, но Зеленски сепак ќе биде во регионот и во следните денови ќе ги посети Обединетите Арапски Емирати, Саудиска Арабија и Турција. Тој кажа дека не планира да се сретне со руски функционери.
Европските лидери, пак, денеска ќе се соберат на вонреден самит во Париз, што Емануел Макрон го опиша како консултациски разговори за Украина. На самитот ќе учествуваат Велика Британија, Франција, Германија, Италија, Полска, Шпанија, Данска и претставници на НАТО и Советот на Европа.
