Раперот Снуп Дог ќе биде меѓу последните носители на олимпискиот факел пред петочната церемонија на отворањето на Олимписките игри во Париз. Педесет и двегодишниот музичар, кој од Игрите ќе се јавува и како ТВ-коментатор, ќе трча со факелот по улиците на Сен Дени, каде што се наоѓа Олимпискиот стадион.

На него ќе му се приклучат актерката Летиција Каста и францускиот рапер Ем-Си Солар. Сен Дени е претпоследната делница од патувањето на факелот, чија последна станица е Ајфеловата кула.

Олимпискиот факел помина низ цела Франција откако тргна на својот пат во мај и досега го носеа бројни познати личности, како актерките Салма Хајек и Хали Бери, фудбалските тренери Арсен Венгер и Дидје Дешамп и Формула 1 возачот Шарл Леклерк.

Првпат во историјата, церемонијата на отворањето нема да се одржи на стадион, туку на реката Сена, каде што ќе пловат 85 бродови со олимпијците.