Државниот секретар на САД Марко Рубио изјави дека украинскиот предлог за привремено примирје со Русија е ветувачко, во пресрет на денешните разговори помеѓу американска и украинска делегација во Саудиска Арабија.

„Нема да кажам дека самото тоа е доволно, но е еден вид отстапка што треба да се направи за да се заврши војната“, изјави Рубио.

Се очекува Киев да предложи воздушно и поморско примирје на разговорите во Џеда. Русија досега ја одбиваше идејата за привремено примирје, сметајќи дека Украина така би купувала време.

Володимир Зеленски вчера пристигна во Саудиска Арабија, но не се очекува да биде формално вклучен во разговорите. Покрај Рубио, во американскиот тим ќе бидат и советникот за национална безбедност Мајк Волц и специјалниот претставник за Блиски Исток, Стив Виткоф, додека Украина ќе ја застапуваат шефот на кабинетот на Зеленски, Андриј Јермак, советникот за национална безбедност и министрите за одбрана и надворешни работи.

„Се надевам на практичен резултат на разговорите. Украинската позиција ќе биде апсолутно конструктивна“, кажа Зеленски.

Пред доаѓањето во Џеда, Рубио изјави дека е важно јасно да се утврдат украинските намери за мировен договор.

„Украина мора да биде подготвена да направи тешки работи, исто како и Русија, за да се заврши војната. Нема да поставам никакви услови што треба да направи. Сакаме да слушнеме колку далеку се спремни да одат и да го споредиме тоа со она што Русите го сакаат. Двете страни мора да сфатат дека не постои воено решение на војната и дека тоа мора да се постигне на дипломатски начин“, рече Рубио.

Некои американски медиуми објавија дека Виткоф ќе се сретне со Владимир Путин во Москва подоцна оваа недела, што досега не е потврдено од Кремљ.