Русија ќе ги распореди новите хиперсонични проектили „орешник“ во Белорусија следната година, изјави белорускиот претседател Александар Лукашенко.

Тој кажа дека во петокот ги побарал новите проектили од Владимир Путин бидејќи стравува од ескалација поради присуството на полските и литванските трупи покрај западната граница на Белорусија. Тамошните медиуми објавија дека Лукашенко сега разгледува каде да ги постави овие проектили.

„Русија ќе ни ги даде овие проектили бесплатно, а ние сами би одлучиле што би гаѓале со нив“, кажа Лукашенко.

Русија првпат го употреби „орешник“ минатиот месец во напад врз Днипро, како одговор на украинските удари врз руска територија со западни проектили со долг дострел. Владимир Путин потоа објави дека ниедна држава на светот не може да се спротивстави на ова оружје и дека Русија е спремна повторно да го употреби во воени услови.

„Новиот хиперсоничен балистички проектил ја намалува потребата од нуклеарно оружје. Сега нема потреба да ја подобруваме нуклеарната доктрина, туку ‘орешник‘“, кажа Путин вчера.