Руските сили влегле во периферијата на источниот украински град Торецк, објави украинската војска, што се случува помалку од една недела по падот на уште еден украински бастион во регионот Доњецк, Вугледар.

„Ситуацијата е нестабилна, борбите се водат на речиси сите влезови во градот. Русите влегоа во источните предградија“, изјави Анастасија Бобовникова, портпаролка на оперативната тактичка група „Луганск“.

Руските воени блогери објавија дека руските трупи продолжуваат да напредуваат кон центарот на Торецк.

Последните напредувања на руските сили на источниот фронт ја нагласуваат нивната надмоќ во луѓе и оружје. Русија, која контролира помалку од една петина од украинската територија, напредуваше кон Торецк од август, заземајќи села едно по друго, додека пешадијата беше потпомогната од уништувачките наведувани бомби.

За Украина, Торецк беше првата линија на фронтот десет години зашто се наоѓа блиску до териториите што проруските сепаратисти ги зазедоа во 2014. Торецк до 2016 го носеше името Ѕержинск, според Феликс Ѕержински, основачот на тајната советска полиција.